Erläbnisbricht us Kuala Lumpur

Posted September 11th, 2007 by Jonas

Hello!

Ds letschte Wuchenend isch schlicht und eifach genial gsi. Zäme mit ere Gruppe Ustuschstudänte han i Kuala Lumpur in volle Züg gnosse. Hie chasch du vo mine Erläbnis erfahre…

Allerdings möcht i chli Abwächslig i das Blog bringe und o nid immer siitelängi Artikle schribe. Drum gits diesmau e Audio-Bricht vo mire Reis nach Kuala Lumpur. Viu Spass bim Lose!

PS: ogg/vorbis isch es freis Audioformat, ähnlech wie mp3. Du söttischs mit aune guete Audioplayer chönne abspiele, zum Bispiu mit xine, vlc, xmms, winamp…

PPS: Bilder gits im Album Kuala Lumpur

PPPS: Wenn du ufe Name vom Bild klicksch, chasch e Kommentar drzue gä. Das funktioniert o mit em Link unger däm Artikel und fröit mi immer sehr.


Kuala Lumpur

On September 11th, 2007 Katharina says:

Hoi Jonas

danke viu mau für di mündlech Bricht. I findes e luschtigi Idee! Dini Gschicht hett mer ou sehr gheimelet. Isches dir bewusst, dass mir ganz ähnlech vo Bali und Palangka Raya brichtet hei? Denn haut no mit Kassette aber mit der gliche Hindergrundmusig (sprich Gezirpe) wie du se jetz hesch. I wirde no ganz melancholisch.

Gäu, es si dir sicher viu Wörter bekannt vorcho, z Kuala Lumpur? Hesch öppis verstande. we d’Lüt Malayisch gredt hei?

Mir gniesse jetz o grad üsi erschte Ferietäg. Nächscht Wuche göh mer mit Haldimanns e Wuche is Tessin. Mir hei e grossi Feriewohnig gmietet. I fröie mi.

Lah ders lah guet ga! mhfg!

Mit ganz liebe Grüess
Katharina/Mueti


Also ezz hanis mit em Real

On September 12th, 2007 Christine (nicht überprüft) says:

Also ezz hanis mit em Real Player ond sogar em Windows Media probiert ond die wönd beed nüd. Haiaiai, wa mueni denn inschtalliere zum dinere süesse Stimm zue zlose? (Sorry, bin echli müed ond dromm chli sarkastisch, merkt mers ?;) )
Liebe Gruess os Canada,
d’Christine
PS: I waiss, du wartisch immer no uf en Antwort vo mir… Chunnt chunnt


Abspiel-Problem und Grillegezirp

On September 12th, 2007 Jonas says:

Hello,

Ufgrund vo höchem Peer-Pressure ;-) han i mi entschiede, itz doch en mp3-Version vo min Bricht uechezlade… Me macht sech auso uf d’Suechi nachemne mp3-Encoder und het nach es bitzeli experimentiere tatsächlech en mp3-Datei vor sich. I hoffe, i heig dür das keni Patent vom Fraunhofer Institut verletzt… Für aui Lüt ohni guete Audioplayer gits hie somit d’mp3-version vom Audiobricht. Alternativ chame sich im Internet e Codec füre Windows Media Player abelade und die höcheri Qualität gniesse.

Ja, i finde ds Grillegezirp ganz amüsant. Dr Grund, wieso dasses so prominänt isch i dere Ufnahm, isch dass i mi Bricht dusse vor em Zimmer ufgno ha. Es isch nämlech spät am Abe gsi, mi Mitbewohner het scho gschlafe…

Grüessli us Singapur, Jonas

PS: Scho rächt… chas verstah, wenn me bi so Theme chli sarkastisch wird. Nimms mer bitte nid übel.